Ons het die week met Sigmar Rosenthal gesels om te hoor hoe hulle Kersfees in Bahrein vier.
As gevolg van die feit dat Bahrein so ’n smeltkroes van kulture is, leen ’n mens bietjie hier en daar wanneer dit kom by Kersgewoontes en -tradisies. Iets soos glühwein wat ons eintlik nooit in Suid-Afrika sou drink nie, het ons hier leer drink tydens Kerstyd. Ons woon graag Kerskonserte by waar die koor Kersliedere opvoer.
Ons braai steeds! In Bahrein is daar nie eintlik tradisionele Kersfeesdisse nie, maar baie restaurante sal tradisionele Engelse disse bedien soos maalvleispasteie, Yorkshire-poeding ens. ’n Mens kan ook gemmerbroodmannetjies of -huise by die supermark koop. ’n Kersfees-“brunch” is ook baie gewild in Bahrein. Restaurante bied ’n volledige Kersmaal aan waar jy onbeperk kan eet en drink vir ’n sekere bedrag.
Die primêre geloof in Bahrain is Islam, maar die oorgrote meerderheid van mense vier steeds Kersfees – nie uit ’n geloofsperspektief nie, maar eerder net as ’n samekoms vir familie en vriende. Daarom is die feesgevoel steeds daar. Die winkels is vol Kersversierings en Kersliedjies. Die meeste restaurante en winkels is versier met Kersversierings. Die radio speel onophoudelik Kersmusiek. En selfs troeteldierwinkels verkoop Kersfeesjassies vir jou troeteldier.
Desembermaand in Bahrein is ook die maand waarin ons Bahrein se nasionale dag vier (16 Desember). Daarom is die hele eiland verlig met liggies en die mooiste uitstallings. Elke boom is bedek met liggies. Die winkels is vol versierings en die meeste huise is ook opgemaak.
Wat tradisies aanbetref leen ons maar ’n bietjie hier, vat ’n bietjie daar en behou steeds ons eie tradisies. As ons saam met die Engelse kuier, vier ons soos hulle vier en as ons saam met die Iere kuier, vier ons weer op hulle manier. Maar ongeag die kultuur, is enige Kerspartytjie ’n samekoms van vriende en ’n absolute feesviering. Ons koop steeds ons adventkalenders, slaan ons Kersboom op net ná November (of soms selfs bietjie vroeër), versier die huis met liggies en sit geskenke onder die boom.
Die belangrikste tradisie vir ons is om Kersfees saam met familie te vier. En omdat ons nie fisiek by ons familie kan wees nie, het ons ’n nuwe tradisie begin – ons bel ons familie op ’n “Google meet”. Deur die loop van die aand word die skootrekenaar van persoon tot persoon aangegee en ons gesels lekker met almal. Ons sit selfs aan tafel en neem deel as almal geskenke oopmaak! Só is ons virtueel deel van die feesvieringe en vier ons dit steeds saam met familie.
Skryf vir ons
Woon jy in die buiteland of het jy dalk onlangs teruggekeer uit die buiteland? Jy kan ook vir ons skryf. Stuur ’n e-pos na wereldwyd@afriforum.co.za en ons stuur vir jou vrae om te beantwoord.
