Nieu-Seeland, Australië, Amerika, Brittanje en selfs Swede – Suid-Afrikaners is reg oor die wêreld versprei. Met die COVID-19-pandemie is dit moeiliker as gewoonlik om die feesseisoen saam met familie en vriende deur te bring. Ons het op Facebook ons Saffa-vriende gevra hoe vier hulle Kersfees in die buiteland, en hier is wat hulle gesê het:
Kersfees in Swede
Kersfees in Swede is “Jul”. Dit word op 24 Desember gevier, op Oukersdag. Die sneeu lê meestal dik teen hierdie tyd. Elke venster het ’n ster of ’n kandelaar wat brand. Kersete bestaan uit ’n boud ham, rou salm (“gravad lax”) met sterk mosterd, verskillende ingelegde harings, gekookte eiers met kaviaar, “Janssons frestelse” (’n gereg met aartappels, uie, kaas en ansjovis wat gebak is), ribbetjies, ’n tipe soet bruin brood met rosyne in, ’n klein Hollandse ronde kaas, frikkadelle en klein prinsworsies met soet mosterd.
Nagereg is gewoonlik saffraanspannekoek met rosyne in, aarbeikonfyt en room. Mens drink gewoonlik ’n paar spesiale biere saam met die ete. Rooiwyn werk ook. Ná Kersete sit almal en kyk ou kinderprente soos Donald Duck.
’n Ander Suid-Afrikaner in Swede skryf: “Die sneeu het reeds begin val. Oral is feestelike Kersmarkte met liggies en warm sjokolade, speserykoekies en “glogg”. Maar ons gaan beslis ’n lamsboud met gebraaide aartappels en pampoenpoffers eet. Dit smaak soos huis!”
Kersfees in Nieu-Seeland
Ons het Somerkersfees hier op die Suideiland van Nieu-Seeland. Ons geniet ’n varkboud op die Weber, bring-’n-slaai, pavlova en koekstruif vir poeding. Almal is altyd welkom om te kom kuier, en as die dag mooi is, sal ons in die meer gaan swem en bietjie bootry.
Nog ’n Suid-Afrikaner in Nieu-Seeland skryf: ”Hier in Nieu-Seeland vier ons dit by die see op ’n lekker warm somersdag, nes die ou dae op Margate .”
Kersfees in Skotland
Winter in Skotland, met ’n skaapboud, kalkoen en varkboud, pampoenkoekies en die tradisionele koekstruif waarmee ek grootgeword het. Lekker warm pons vergoed darem vir die koue. Dis ongelukkig ’n alleentyd sonder enige familie, dié tyd van die jaar verlang ons baie.
Kersfees in Australië
Dit is ’n lekker warm (35–45 grade) Kerstyd hier in Australië in die buitewyke van die “Outback”. Baie soos Kakamas waar ons oorspronklik vandaan kom. Boudvleis, gevulde eiers en al die tradisionele lekkernye is altyd teenwoordig. Vanjaar sal al die kinders en skoonkinders by die huis wees, en ook baie van ons eks-Suid-Afrikaanse vriende, wat nou ook al familie is. Ons het hierdie land ons tuiste gemaak en Kersfees word gevier soos net Suid-Afrikaners kan!
