Die rolprentvervaardigingsmaatskappy Forum Films het vandag aangekondig dat die dokumentêre film Disrupted Land op 7 Maart 2019 in Pretoria bekend gestel sal word. Dié rolprent, wat in samewerking met AfriForum vervaardig is, handel oor die verdraaiing van Suid-Afrika se geskiedenis met betrekking tot sowel grondeienaarskap as die mislukking van grondhervorming in Suid-Afrika. Hierdie aankondiging is gemaak met die publisering van die lokprent op Forum Films se YouTube-kanaal.
Die film is geskep deur Ernst Roets, adjunk- uitvoerende hoof van AfriForum en uitvoerende hoof van Forum Films. Dit sal gebruik word as deel van AfriForum se veldtog om die verdraaiing van die geskiedenis met betrekking tot grondbesit aan die kaak te stel, sowel as om plaaslike en internasionale steun teen onteiening sonder vergoeding te werf.
“Ons moet feitelik en eerlik oor die geskiedenis kan praat. Waar daar gefouteer is, moet ons dit erken; waar sekere dinge reggestel kan word, moet ons dit doen. Terselfdertyd moet ons sterk standpunt inneem teen politici en aktiviste wat die verlede verdraai om hulle eie politieke agendas te dryf. Disrupted Land wys dat die geskiedenis van grondbesit in Suid-Afrika veel meer kompleks is as wat die regerende elite dit wil voorhou; ook dat huidige pogings klaaglik misluk om grondhervorming te dryf, en dat die situasie aansienlik sal vererger indien die regering voortgaan met sy planne om privaat eiendom sonder vergoeding te onteien,” sê Roets.
- Disrupted Land is vervaardig deur Ernst Roets, Louis Gagiano en Alexa Reynecke. Die regisseur is Elrich Yssel.
- Die première van Disrupted Land vind op 7 Maart 2019 by die Menlyn-winkelsentrum in Pretoria plaas.
\
