Deur Anton van Zyl
Dis sowaar al weer Kersfees. Die seisoen van welwillendheid het in ‘n oogwink aangebreek, heeltemal te gou. Die jaar se geswoeg kom tot ‘n einde en ons begin voorberei vir die seisoen van seën en rus.
Die afgelope week of so het allerhande Kersstalletjies in Londen verrys. Daar is Duitse wors en stollen, Kersbome en kammasneeu. Oral is rooi en groen elwe te sien en die ou bekende klanke van “Little drummer boy” en “Jingle bells” kom deur die lug aangesweef. Die einde-van-die-jaar-toeriste het in hul duisende begin opdaag, en dit dra by tot die feestelike gevoel.
Ons was ook nie ledig nie:
- Ons het deur Richmond Park gaan ry op ‘n perdekar wat deur twee Shireperde, Nobby en Heath, getrek is.
- Ons het deelgeneem aan die jaarlikse Winter Wonder Walk deur ons dorp, kompleet met ‘n kalkoenwedren en twee baie sagte rendiere.
- Ons het ‘n konsert van Beethoven se negende simfonie deur ‘n klein orkessie en die Suid-Afrikaanse basbariton Simon Shibambu bygewoon.
- Ons was ook by ‘n Kerssangdiens in die Westminster-kapel; dit was ietwat anders as ons gewone Suid-Afrikaanse Kerssangdienste.
- By al hierdie geleenthede het ons ou vriende en kennisse ontmoet. Ons het met dankbaarheid besin oor die verlede en planne gemaak vir die toekoms.
Soos die meeste mense beplan ons ‘n blaaskans. Ons gaan eers Norfolk toe en dan na William Shakespeare se tuiste, Stratford-upon-Avon, vir die twee dae oor Kersfees.
Hierdie Kersfees, soos die meeste ander die afgelope dekade, sal ons ons in die kultuur van ons aangenome land verlustig en deelneem aan alles wat Engeland bied. En ons sal die vryheid wat ons met die geboorte van ons dierbare Verlosser ontvang het, vier.
Mag julle ‘n geseënde Kersfees en ‘n wonderlike nuwe jaar hê.
Anton en Ronèl van Zyl
