Op 26 Oktober 2016 het Pravin Gordhan, minister van finansies, die Tariewe en Monetêre Bedrae en Wysiging van Wetsontwerp op Inkomstewette, Wetsontwerp 19 van 2016, in die parlement ter tafel gelê toe hy die sogenaamde “Minibegroting” bekend gestel het. Hierdie wetsontwerp bevat die wetgewing wat die Spesiale Vrywillige Openbaarmakingsprogram (SVDP) reguleer, en wat op 1 Oktober 2016 in werking getree het en veronderstel was om op 30 Junie 2017 te eindig. Die wetsontwerp, soos ingedien, bevestig dat die SVDP vir nege maande aktief sal wees in teenstelling met die oorspronklik aangekondigde periode van ses maande. Die staande komitee oor finansies het gevolglik op 24 November 2016 die sperdatum tot 31 Augustus 2017 verleng.
In ooreenstemming met die SVDP moet applikante wat kwalifiseer ’n bedrag gelykstaande aan 40% van die hoogste bedrag van die randterme van die ongemagtigde buitelandse bates aan die einde van elke jaar van assessering wat op of ná 1 Maart 2010 eindig, maar nie op of ná 1 Maart 2015 eindig nie, by hulle 2015 belastinginkomste insluit. Die wetsontwerp is dus die resultaat van die tesourie se aankondiging in September 2016 dat die insluitingstarief van 50% na 40% verlaag is.
Bykomend hiertoe bevat die wetsontwerp ’n voorwaarde wat behels dat die basiskoste van die ongemagtigde buitelandse bates waarvoor ’n aansoek in ooreenstemming met die SVDP ingedien word, beskou sal word asof dit op 28 Februarie 2015 aangekoop is teen ’n koste gelykstaande aan die hoogste markwaarde, in buitelandse geldeenheid, van daardie bate soos bepaal onder klousule 16 van die wetsontwerp. Klousule 16 verwys na die manier waarop die bedrag wat in die applikant se belasbare inkomste in 2015 ingesluit moet word, bepaal moet word. Dit is gebaseer op die markwaarde van die ongemagtigde buitelandse bates in die relevante buitelandse geldeenheid en word in rand omgeskakel teen die lokotarief op die laaste werksdag in Suid-Afrika aan die einde van elke jaar van assessering wat van toepassing is, naamlik 28 Februarie 2011, 29 Februarie 2012, 28 Februarie 2013, 28 Februarie 2014 en 28 Februarie 2015. Hierdie is ’n toegewing aan belastingbetalers wat behels dat die basiskoste van die buitelandse bates prakties verhoog word wanneer die kapitaalwins bepaal word wat aan belasting onderworpe sal wees wanneer daar uiteindelik van die buitelandse bates ontslae geraak word. In stede daarvan om op die historiese koste van die buitelandse bates staat te maak, sal belastingbetalers geregtig wees om op die markwaarde staat te maak wat gebruik word om die belasting te bepaal wat betaalbaar is op daardie buitelandse bates onder klousule 16 van die wetsontwerp.
Kontak Fanus Jonck, belastingkonsultant, by tax@jonck.net met jou belastingnavrae.
