Die burgerregteorganisasie AfriForum gaan die howe nader om ’n dringende interdik te bekom om die regering te verhoed om ’n irrasionele en onwettige skenking van R50 miljoen aan die Kubaanse regering te betaal.
Die aansoek sluit ook ’n hersieningsaansoek in om die besluit om die geld aan Kuba te skenk, om te keer.
AfriForum het vroeër vandeesmaand in ’n prokureursbrief aan die Department van Internasionale Betrekkinge en Samewerking ’n geskrewe verduideliking en redes geëis vir die aankondiging dat die regering die reuseskenking aan Kuba wil maak.
AfriForum het daarop aangedring dat geen fondse na Kuba oorgeplaas moet word nie aangesien geen redes vir die besluit aan die publiek gekommunikeer is nie. Die organisasie het ook ’n verduideliking geëis oor waar die fondse vir die skenking vandaan kom en hoe dit geregverdig kan word in Suid-Afrika se huidige sosio-ekonomiese konteks.
Die regering het op AfriForum se skrywe reageer maar die organisasie is nie tevrede met die verduidelikings wat aangebied is nie en sal dus voortgaan met regsaksie. Die besluit is gemaak sonder enige parlementêre oorsig en sonder om gehoor te gee aan die Wet op Openbare Finansiële Bestuur.