Twee boeke van Jaco Jacobs is gisteraand bekroon by die jaarlikse Suid-Afrikaanse Letterkundetoekennings, beter bekend onder die Engelse akroniem SALA.

In die splinternuwe kategorie vir kinderboeke is drie boeke bekroon, twee van hulle deur Jaco Jacobs.

Die drie boeke wat gewen het, is die kinderrympiebundel Moenie hierdie boek eet nie!, deur Jaco Jacobs (LAPA Uitgewers), die prenteboek Daar’s nie ’n krokodil in hierdie boek nie, deur Jaco Jacobs (LAPA Uitgewers) en die geskiedkundige roman There should have been five, deur Marilyn Honikman (Tafelberg Uitgewers).

Die skrywers deel die prysgeld in dié kategorie.

Jacobs sê die toekenning is vir hom ’n groot eer. “Geletterdheid is regtig ’n groot knelpunt in ons land. Dit is belangriker as ooit dat ons kinders lief moet maak vir lees, en vir hulle goeie, toeganklike, eietydse leesstof moet bied. Ek is daarom regtig dankbaar dat die Suid-Afrikaanse Letterkundetoekennings met dié nuwe kategorie erkenning gee aan die belangrike rol wat kinderboeke in ons samelewing én in ons letterkunde speel.”

Wat bekronings betref, was 2018 ’n groot jaar vir Jacobs. Hy het reeds vanjaar die Tienie Holloway-medalje (vir sy boek Grom!) en twee ATKV-Kinderboektoekennings gewen, en is pas vir Brittanje se oudste en mees prestigeryke kinderboektoekenning, die Carnegie-medalje, benoem vir die Engelse vertaling van ’n Goeie dag vir boomklim.

Die Suid-Afrikaanse Letterkundetoekennings is gisteraand (6 November) tydens ’n spoggeleentheid in Pretoria oorhandig. Boeke in elf amptelike tale kom vir die toekennings in aanmerking.

 

Hierdie artikel is ook beskikbaar in: English

Wêreldwyd
Wêreldwyd

Pin It on Pinterest