Roslyn (’n vakman-juwelier en metaalsmid) se storie het meer as tien jaar gelede begin toe sy geïnspireer is om ’n juweelstuk van haar seun se kunswerk te maak. Sy het sedertdien met verskeie soorte materiaal gewerk, van skulpe, blomme, blare, vingerafdrukke en selfs die handskrif van geliefdes om unieke en asemrowende ringe, hangertjies, mansjetknope, gelukbringers (“charms”), en meer te ontwerp.
“Wanneer ’n klient die storie oor hul spesiale oomblik met my deel, besef ek dit gaan oor baie meer as om net ’n juweelstuk te maak. Dit omvat al hul sintuie op daardie bepaalde oomblik in hul lewens – hoe hulle gevoel het, die mense om hulle, dit wat hulle kon hoor, ruik en sien. Dit is van onskatbare waarde om daardie oomblik met hulle te kan saamdra in die vorm van ’n hangertjie of mansjetknope.”
Roslyn Jewellery is gratis op Wêreldwyd se Wêreldgids gelys. Dié gids stel ander Afrikaners in staat om Suid-Afrikaanse ondernemings in die buiteland te ondersteun.
Die Wêreldgids is waar Suid-Afrikaanse ondernemings van regoor die wêreld bymekaarkom om ’n gemeenskap te vorm. Tans beskik die Wêreldgids oor meer as 1 000 ondernemings, van Afrikaanse dokters in Nieu-Seeland tot biltongwinkels in Londen.
Netwerke is meer as net ondernemings; dit is ook ’n waardevolle wyse om ’n ondersteuningsbasis te bou vir daardie dae wanneer die verlange na ’n goeie Suid-Afrikaanse wyn, kuier om ’n braaivleisvuur en die onmisbare Afrikaner-gasvryheid te veel raak.
