Wes-Transvalers was (en is waarskynlik steeds) bekend vir hulle hardkoppigheid en gehardheid. Dit is juis hierdie eienskap wat burgers van dié area tydens die Anglo-Boereoorlog hulle uitsonderlike uithouvermoë gegee het. In ’n nuwe boek wat binnekort by Kraal Uitgewers verskyn, kom die omvangryke krygsgeskiedenis van dié oorlog in die westelike streek van die toenmalige ZAR in die kollig.
Skrywer, boer, historikus en gebore Wes-Transvaler, Pieter de Jager, se monumentale werk Wes-Transvaal: Militêre brandpunt van die oorlog, 1899-1902 is die sewende en laaste boek in Kraal se gewilde reeks versamelaarswerke, Erwe van ons vaad’re. Dié reeks staan onder redaksie van prof. Andries Raath van die Universiteit van die Vrystaat.
De Jager is nie ’n nuweling in geskiedeniskringe nie. Sy passie vir sy geboortedorp Ottosdal, die omgewing en sy mense het reeds neerslag gevind in die publikasie van ’n vroeëre werk getiteld Die Korannafonteiners: Stories oor Ottosdal en sy mense wat in 2008 by Protea uitgegee is.
Sy nuutste boek is die resultaat van ’n leeftyd se belangstelling in en liefde vir die geskiedenis van die Anglo-Boereoorlog en die oorlog in Wes-Transvaal spesifiek. In sy navorsing vir Wes-Transvaal: Militêre brandpunt van die oorlog, 1899-1902 het De Jager talle voorheen ongepubliseerde manuskripte en klankopnames opgespoor. In hierdie werk word juis ook van die minder bekende oorlogsinsidente van die Wes-Transvaal aan die leser gebied.
Oor die Wes-Transvaalse bevelvoerder en alombekende “Leeu van die Wes-Transvaal”, De la Rey, is De Jager duidelik. “Hy het die vermoë gehad om mense aan te trek,” sê De Jager. Die generaal, dikwels slegs gewapen met sy karwats, het “sonder twyfel kop en skouers bo ander uitgestaan”. Hy was ’n geharde vegter in murg en been. En sy burgers? Van die dapperste in die hele oorlog, meen De Jager. Maar hoe dan anders? Die ongenaakbare Wes-Transvaal het sy seuns geen ander keuse gelaat nie.
Kontak Kraal Uitgewers by kraal@kraaluitgewers.co.za om jou naam op die voorafbestellingslys te voeg en ons sal jou in kennis stel sodra die boek beskikbaar is.
