Deur Ilze Nieuwoudt
Een van die bekendste historiese bome in Suid-Afrika is waarskynlik die sogenaamde posboom in Mosselbaai. Op 7 Julie 1501 vind João da Nova (sien illustrasie), ’n Spaanse seevaarder in diens van ’n Portugese handelsmaatskappy, ’n skoen onder ’n witmelkhoutboom (Sideroxylon inerme) in Mosselbaai. Da Nova was op sy eerste reis onderweg na Indië. ’n Brief was volgens oorlewering in ’n skoen gestoor en aan die boom opgehang. Dit is ’n jaar vantevore deur Pedro d’Ataide, ’n bevelvoerder van ’n skip van Pedro Alvares Cabral, geskryf. Dié witmelkhoutboom waar die brief gevind is word as Suid-Afrika se eerste posbus beskou en ’n monument gedenk vandag nog dié gebeurtenis van meer as 500 jaar gelede. Da Nova word beskou as die ontdekker onder meer St. Helena in die Atlantiese Oseaan.