Paul C. Venter se reekse (onder meer Arende, Torings, Konings, Vlug na Egipte) is met rede gunstelinge onder Suid-Afrikaners en sy jongste reeks, Knapsekêrels, beloof net soveel intrige en opwinding soos vorige stories uit sy pen. Dié kykNET-reeks speel in Johannesburg af en handel oor vier uiteenlopende families: Die Bekkers, Zimmermans, Davidse en Fortuins leer mekaar noodgedwonge beter ken wanneer ’n lid van elke gesin by ’n jaagtog om oorlewing en bestaansreg in die groot stad betrokke raak. Skalkie Fortuin en Mynie Bekker werk saam by Interactive Security, en Skalkie kry die geleentheid van ’n leeftyd wanneer hy aangestel word om die welgestelde sakeman Hans Zimmerman se dogter, Addie, op te pas. Die opdrag is egter nie naastenby so eenvoudig soos dit klink nie. Bekendes soos Dawid Minnaar, Christia Visser, Armand Aucamp, André Odendaal, Sandi Schulz en Terrence Bridgett is in die uurlange episodes te sien. Maak seker jy mis nie ’n oomblik van die aksie nie: Daar is weekliks ’n nuwe episode op ShowMax.
